26 noyabr 2020-ci il tarixində Sənaye və İnnovasiyalar üzrə Bakı Dövlət Peşə Təhsil Mərkəzi və Malayziya Texnologiya Universiteti arasında onlayn görüş keçirilib. Görüş hər iki tərəfin rəhbər və mütəxəssis həyətdən ibarət nümayəndələrinin iştirakı ilə həyata keçirilib.

Görüşün həyata keçirilməsində başlıca məqsəd olaraq gələcəkdə qurulacaq əməkdaşlıq istiqamətində təkliflərin  və müzakirələrin aparılması dururdu.

Onlayn görüş zamanı hər iki tərəfin təmsilçilərinin mövqelərinin qısa şərhindən sonra, təhsil müəssisələrinin rəhbərləri təmsil etdikləri müəssisəni təfərrüatlı şəkildə ifadə edən slayd təqdimatlarla çıxış ediblər, təmsil etdikləri qurumun fəaliyyəti barədə ətraflı məlumat verərək, görüşün elm, texnologiyalar, təhsil sahəsində qarşılıqlı əlaqələrin genişləndirilməsi baxımından xüsusi əhəmiyyət kəsb etdiyini bildiriblər.

Qurumlar bir sıra - məlumat, bilik və material mübadiləsi, tələbə mübadiləsi, kadr mübadiləsi, birgə tədqiqat, birgə tədris və təlim proqramları, müvafiq ixtisaslar üzrə professional proqram təlimləri, dual sertifikatlaşdırma proqramları istiqamətlərində əməkdaşlıq imkanlarını müzakirə ediblər. Müzakirələr zamanı nəzərdən keçirilməsi üçün bir sıra təkliflər verilmişdir.

Qeyd edək ki, Təhsil Nazirliyi yanında Peşə Təhsili üzrə Dövlət Agentliyinin direktor müavini Ceyhun Kərəmov da bu görüşdə iştirak edib. Ceyhun Kərəmov peşə təhsilinin inkişaf  etdirilməsi, yeni, müasir vasitələrin təhsildə tətbiqi üçün bu kimi beynəlxalq əməkdaşlıq əlaqələrinin qurulmasına geniş yer verilməsinin əhəmiyyətini vurğulayıb və qurulacaq bu əlaqənin hər iki tərəf üçün zəruri rol oynayacağını bildirib. 

Hazırki ilkin müzakirələrin, fikir mübadiləsi və təkliflərin dəyərləndirilməsi növbəti həftə ərzində həyata keçirilməsi nəzərdə tutulub.

Görüşün yekununda hər iki tərəf qeyd olunan fikir və təkliflərdən çıxış edərək qurulacaq əməkdaşlığın səmərəli və geniş istiqamətli olacağını ifadə ediblər.