Peşə təhsil sahəsində yüksək innovativ texnologiyalara və tədris proqramına malik Sənaye və İnnovasiyalar üzrə Bakı Dövlət Peşə Təhsil Mərkəzi hər zaman öz təhsilalanları və məzunlarının inkişafı istiqamətində fəaliyyət dairəsini genişləndirməkdədir. Daxili təcrübə və imkanları ilə məhdudlaşmayan Mərkəz öz fəaliyət sahəsində digər kənar təcrübə və texniki baza ehtiyatlarını da tətbiq edir. Bu səbəbdən, Mərkəz mütəmadi olaraq dövlət və özəl sektorla əməkdaşlıq şəbəkəsini genişləndirir. Ötən günlərdə Mərkəz ilə “Mətanət A” şirkəti arasında anlaşma memorandumu imzalandı.

Şirkətlə yaradılan əməkdaşlığın başlıca məqsədi “İnşaat” istiqaməti üzrə kadr hazırlığını təşkil etmək və gələcək kadr ehtiyaclarının ödənilməsi istiqamətində birgə fəaliyyət göstərməkdir. Əməkdaşlıq çərçivəsində Mərkəzdə müvafiq istiqamətlər üzrə təhsil alacaq tələbələrin peşəkar bacarıqlarının inkişafı məqsədilə iş yerində təcrübə proqramları keçirilməsi və məzun tələbələrin işlə təmin olunması üzrə “Mətanət A” şirkəti tərəfindən dəstək göstərilməsi də nəzərdə tutulur.

Qeyd edək ki, şirkət ən son rəqəmsal texnologiyalarla təchiz olunmuş zavodlarında avtomatlaşdırılmış formada istehsal prosesini həyata keçirərək inşaat məhsullarının istehsalı ilə məşğuldur. Belə ki, “Avtomatika” istiqaməti üzrə təhsil alan tələbələr şirkətin mühəndis heyətindən, eləcə də, aparıcı mütəxəssislərindən avtomatlaşdırılmış avadanlıqların işləmə prinsipləri ilə əlaqəli məlumatları əldə etmə və təcrübə etmə imkanına malik olacaqlar.

Təhsilalanların bilik və bacarıqlarının təkmilləşdirilməsinin zəruriliyini nəzərə alaraq, onların istehsalat təlimi keçmələrinə şərait yaradılması, ixtisas təkmilləşdirilməsi üzrə birgə kursların, qarşılıqlı maraq kəsb edən mövzularda seminarların, təlimlərin, tədris proqramları və layihələrin təşkil olunmasında  tərəfdaş şirkət tərəfindən dəstəyin göstərilməsi də nəzərdə tutulmuşdur.