Yeni tədris ilinə hazırlıq prosesinin davamı olaraq Sənaye və İnnovasiyalar üzrə Bakı Dövlət Peşə Təhsil Mərkəzi ötən ilki məzunlarının uğur hekayələrini yazmağa davam edir. Zamiq Tahirov Mərkəzin uğurlu məzunları siyahısına adını yazdıran gənclərdəndir. Zamiq, “Avtomobil diaqnostikası və təmiri üzrə usta” ixtisasının məzunudur.

Peşə təhsili almağı seçməkdə məqsədiniz nə idi və Mərkəzdə aldığınız təhsilin sizin karyeranızdakı inkişafınıza nə kimi təsiri oldu?

İlk öncə, peşə təhsili almaq seçimim texniki bilik və bacarıqlara yiyələnmək istəyimdən irəli gəlirdi. Həmçinin, çalışdığım sahə üzrə özümü inkişaf etdirmək istəyirdim. Bu məqsədlə Mərkəzə üz tutdum və avtomobil sahəsində ixtisas seçimi etdim. Ümumiyyətlə, Mərkəzə gəlmədən öncə buradakı dərslərin Koreya modelinə əsaslanan proqram əsasında keçiriləcəyi, 60-70% praktiki dərslərə üstünlük veriləcəyi barədə məlumat almışdım. Həqiqətən də burada təhsil aldığım müddətdə bunun şahidi oldum. Zənnimcə, dünya standartlarına uyğun şəraiti olan Mərkəzdə təhsil almağım, yeni texniki avadanlıqlarla tanışlığım və istifadə imkanım, peşəkar kollektivin nümayəndəsinə çevrilməyim buradan qazandıqlarımdır. Bundan əlavə, Mərkəzdəki təhsilimi başa vurduqdan bir müddət sonra İmprotex Motors (BMW) şirkətində fəaliyyətə başlamışam. Hal-hazırda burada “Avtomobil diaqnostikası və təmiri üzrə təcrübəçi” kimi fəaliyyət göstərirəm.

Yeni tədris ilində Mərkəzdə təhsil almaq istəyən insanlara tövsiyyəniz nə olardı?

Yeni tədris ilində yeni təhsilalanlara müvəfəqiyyət arzu edirəm. Tövsiyyəm odur ki, seçdikləri peşəyə dərindən yiyələnməyə çalışsınlar və daim daha çox öyrənməyə meylli olsunlar. Daha yüksək nailiyyətlər əldə etmək üçün məqsədli olmaq lazımdır. O məqsədə çatmaq üçün isə özlərini daim inkişaf etdirməyə, yenilikçi olmağa çalışsınlar. Hər kəs öz uğur hekayəsini yaza bilər, sadəcə bunun üçün əzmli olmaq lazımdır.