Sənaye və İnnovasiyalar üzrə Bakı Dövlət Peşə Təhsil Mərkəzi 2020-ci il məzunlarının uğur hekayələrini bölüşməkdə davam edir. Bu hekayənin ərsəyə gəlməsində həyata keçirdiyimiz müsahibənin həmsöhbəti “Elektronika ustası” ixtisasının məzunu Firavan Şükürovdur.

Hansı amillər sizdə peşə təhsilinə yiyələnmək kimi fikrin formalaşmasına təsir etdi? Təhsil aldığınız peşə ixtisası üzrə Mərkəz sizin karyera inkişafınızda nə dərəcədə rol oynadı?

Peşəyönümü üzrə təhsil səviyyəsinə yiyələnməkdə başlıca təsiredici amil elektronika sahəsinə olan marağım və eləcə də həmən sahə üzrə minimal da olsa təcrübəm olmuşdur. Mərkəzə gəlmədən öncə buradakı dərslərin Koreya modelinə əsaslanan təhsil proqramına uyğun keçiriləcəyi barədə aldığım məlumat diqqətimi çəkən məqamlardan biri idi. Mərkəzə qəbul olduqdan və sözügedən sahə üzrə tədrisə başladıqdan sonra həm təhsil alacağım təhsil ocağı və həm də yiyələnəcəyim ixtisas seçimində yanılmadığıma əmin oldum. Tədris olunan dərslərin praktikada tətbiqinin mümkünlüyü, bu peşəyə yiyələnmək üçün ayrılmış tədris prosesini daha da maraqlı edirdi. Praktiki məşğələlərin peşə təhsilində olan əhəmiyyəti zənnimcə çox böyükdür. Bundan əlavə, Mərkəzdə təhsil almaq müəssisələrin və şirkətlərin işçi tələbatını və xüsusiyyətlərini öyrənməyimə yardımçı oldu.

Mərkəzin məzunu olduqdan sonra karyeranızda nə kimi dəyişiklik baş verdi? Gələcək təhsilalanlara burada təhsil almağı tövsiyə edərdinizmi?

Təhsilimi başa vurduqdan bir müddət sonra Sumqayıt Texnologiyalar Data Mərkəzində (STDM)  işə qəbul oldum. Hal-hazırda tutduğum vəzifəm ixtisasım üzrədir. Çalışdığım müəssisədə elektronika ustası kimi fəaliyyət göstərirəm. Həmçinin, öz inkişafımı davam etdirirəm. Qeyd edim ki, məzun olduğum Mərkəzdə karyera inkişafının təməlini qoymaq üçün kifayət qədər resurs var. Bu resurslardan düzgün istiqamətdə yararlanmağı təhsilalanlara məsləhət görürəm.