Peşə Təhsili üzrə Dövlət Agentliyinin təşkilatçılığı peşə təhsili sahəsində bilik və bacarıqların artırılmasını hədəfləyən avtomobil ixtisası üzrə növbəti Bootcamp proqramı rəsmi olaraq fəaliyyətə başlayıb. Təlimdə müxtəlif peşə təhsil müəssisələrinin avtomobil ixtisasları üzrə müəllimləri sahənin ən son yenilikləri və tətbiqi bilikləri ilə tanış edir. 

Proqramda Türkiyədən dəvət olunmuş təcrübəli mütəxəssislər – Fatih Köz və Okan Kırbaç, Otomotiv Endüstrisi İhracatçılar Birliyi Mesleki və Teknik Anadolu Liseyinin nümayəndələri kimi iştirak edirlər. Onlar avtomobil təmiri sahəsində həm nəzəri, həm də praktiki biliklərini iştirakçılarla bölüşürlər.

Beş gün davam edəcək təlim (06.10.2025–10.10.2025) müddətində mühərrik sistemlərinin diaqnostikası, mexaniki və elektron nasazlıqların aradan qaldırılması, eləcə də avtomobil texnologiyalarında müasir tendensiyalar kimi mövzulara toxunulur. 

Proqramın əsas məqsədi peşə təhsili müəssisələrində tədrisin keyfiyyətinin yüksəldilməsi, müəllimlərin praktiki bacarıqlarının artırılması və gələcək mütəxəssislərin daha dərindən biliklərə yiyələnməsinə şərait yaratmaqdır.

Bootcamp həmçinin yerli müəllimlərə beynəlxalq təcrübədən faydalanaraq müasir texnologiyaları mənimsəmək imkanı yaradır və Türkiyə–Azərbaycan əməkdaşlığının peşə təhsili sahəsindəki uğurlu nümunələrindən biri kimi qiymətləndirilir.